الاعضاء الVIP
Ahmed Adel Vip Founder المستخدم أخفى الأرباح
أكثر الأعضاء تحقيق للأرباح هذا الاسبوع
تقني بلس - Teqany Plus Articles admin حقق

$1.53

هذا الإسبوع
Sidaty المستخدم أخفى الأرباح
Ahmed Adel Vip Founder المستخدم أخفى الأرباح
Ahmed حقق

$1.10

هذا الإسبوع
YoussefMagdy المستخدم أخفى الأرباح
shehab حقق

$0.45

هذا الإسبوع
أهم المعلومات حقق

$0.44

هذا الإسبوع
Ahmed Adel حقق

$0.43

هذا الإسبوع
ايمان خشاشنة المستخدم أخفى الأرباح
مصطفي منصور المستخدم أخفى الأرباح
قصص الأنبياء و الخلفاء الراشدين

قصص الأنبياء و الخلفاء الراشدين


 

بعد قتل قابيل لأخيه هابيل.... ساح قابيل في الأرض محدش يعرف هو تاب ولا لأ وهل هو من أهل الجنة ولا من أهل النار،
لأن مفيش أي حديث صريح يوضح المسألة دي 😊
حزن آدم لموت ابنه الصالح هابيل واستمر يعلم ذريته تعاليم الدين وخصوصا ابنه شِيث،
بذل معاه مجهود أكبر عشان هيعهد له بالنبوة من بعده،
فآدم عليه السلام هو أول نبي وهم مش رسول بالمناسبة 😁
سُئل رسول الله صلى الله عليه وسلم عن آدم أنبي هو؟
قال: "نعم، نبيٌ مُكلم"

والفرق بين النبي والرسول ...إن النبي بيجيله الوحي لكن غير مأمور أو مُلزم بتبليغ الوحي ده...يعني يجيله الوحي إنه يصلي ويصوم يفعل الخيرات وهكذا،
لكن الرسول يأتيه الوحي إنه يعمل الصالحات وكمان يجب عليه إنه يأمر الناس إنهم يعملوا الخيرات،
فكل رسول نبي ومش كل نبي رسول 😉
فالأنبياء اكتر من الرسل😊

☆طيب بالمناسبة السعيدة دي ياترى كم عدد الأنبياء والرسل😁
قال أبو ذر رضي الله عنه:
 قلت يا رسول الله: كم وفاء عدة الأنبياء ؟ 
قال : مائة ‏ألف ، وأربعة وعشرون ألفا ، والرسل من ذلك: ثلاثمائة وخمسة عشر.
< يعني الرسل والأنبياء عددهم كووولهم < ١٢٤٠٠٠👌
< منهم< ٣١٥ > رسول ....ربنا أخبرنا في القرآن عن < ٢٥ 
وفي السنة رسول الله صلى الله عليه وسلم قالنا عن إتنين هما شيث بن آدم ويوشع بن نون 😊

فآدم عليه السلام نبي وبيطيع ربنا بما يُوحي له ربنا،
وبيعلم أولاده الدين عشان تستمر عبادة ربنا لأن الأبناء تبع للأب في الغالب 😊
فآدم عليه السلام كان مهتم ومركز على تعليم ابنه شيث عشان يقود ذرية آدم من بعده،
عاش آدم عليه السلام ألف سنة وفي هنا قصة حصلت مع آدم بمناسبة عمره 😁
وهي إن ربنا لما خلق آدم عليه السلام ومسح على ظهره ونزلت ذريته وشافهم ...كان بين عين كل واحد بريق من نور، يعني بين عين كل البشر ضوء بيبرق، 
فلفت نظر آدم عليه السلام إن كان في واحد من أبناؤه البريق بتاعه قوي فسأل آدم عليه السلام ربنا : من هذا🤔....ربنا قاله : هذا داوود
فقال آدم عمره هيبأى كم سنة🤔
فقال الله: ستين سنة ....فقال آدم : يارب زوّده من عمري أربعين سنة.
فلما خلص عمر آدم عليه السلام إلا أربعين سنة وجاله ملك الموت عشان يقبض روحه فآدم قاله إن عمره لسه فيه أربعين سنة،
فملك الموت قاله مش إنت أعطيتها لابنك داوود؟ 
فجحد آدم جحود النسيان لأن داوود كان في عالم الذر فنسي آدم الموضوع لما شاف ملك الموت😅
والقصة دي موجودة في حديث صحيح👆😊

بعد ما مات آدم عليه السلام ورث العلم والنبوة من بعده ابنه شيث...وكان يدعو الناس للخير ويعلمهم الدين ...زي ما كان آدم عليه السلام بيعمل،
المفسرون بيقولوا إن في جزئين من أبناء آدم ،
جزء سكنوا الجبل⛰ وهو شيث وإللي معاه وكانوا صالحين متبعين لشريعة شيث وآدم عليهما السلام ، وكان الرجال فيهم شكلهم حلو والنساء شكلهم مش حلو...فيهم قُبح
وجزء تاني سكنوا السهل🏞 وكانت النساء فيهم جميلات والرجال لأ،
جاء إبليس لرجل من أهل السهل وكان معروف عنهم بإنهم يميلوا للباطل، جالهم في صورة غلام عشان يشتغل عنده ويخدمه ، 👌
فإبليس عمل لنفسه حاجة كده زي  إللي الرعاة بيستعملوه زي مزمار يعني فأخرج منه صوت الناس مسمعتش زيه أبدا 😮
فبدأ الناس ييجوا للغلام إللي هو إبليس عشان يسمعوا الصوت ده،
وكانوا عاملين عيد ...كل سنة يجتمع فيه الرجال والنساء،النساء تتبرج للرجال... يتزينوا بأجمل ماعندهم ويخرجوا في أجمل منظر،
والرجال تتزين للنساء... وطبعا مع انتشار الصوت وصل الصوت لقوم شيث عليه السلام وكان محرم عليهم إنهم يختلطوا باللي عايشين في السهول ويُقال إنهم قوم قابيل،

في مرة تجرأ رجل من أهل الجبل وقرب منهم وهم في العيد فشاف النساء وجمالهن فرجع لأصحابه وحكى لهم على إللي شافه وأغراهم فسابوا عيشتهم في الجبل ونزلوا لأهل السهل،
طبعا الرجال افتتنوا بالنساء الجميلات والنساء افتتنوا بالرجال إللي كان في خلقتهم جمال😑
وكان ده أول زنا يقع في تاريخ البشرية، وانتشرت الفاحشة بينهم، وده تفسير ابن عباس لقوله تعالى :
" وَلَا تَبَرَّجْنَ تَبَرُّجَ الْجَاهِلِيَّةِ الْأُولَى"
خلال الفترة دي كان مات شيث عليه السلام ومات ابنه ومكنش في أنبياء في الفترة دي لحد ما أكرم الله تعالى إدريس عليه السلام بالنبوة ،فكان أول نبي بعد شيث وآدم عليهما السلام😊
"وَاذْكُرْ فِي الْكِتَابِ إِدْرِيسَ إِنَّهُ كَانَ صِدِّيقًا نَبِيًّا "
وكان إدريس عليه السلام أول من شرع القتال في سبيل الله، لأن قوم قابيل أو القوم إللي كانوا عايشين في السهل أفسدوا في الأرض وتعدوا على أهل الإيمان من إللي بيسكنوا الجبل،
فجهز إدريس الجيوش وهجم عليهم بالخيول والمشاة فهزمهم وقتل منهم فكان ده سبب في تقليل من شرورهم،
ويُقال إن هو أول من كتب بالقلم وعلم الناس الكتابة 
وربنا أثنى عليه ورفع مكانته 
"وَرَفَعْنَاهُ مَكَانًا عَلِيًّا"

ورسول الله صلى الله عليه وسلم قابله في ليلة الإسراء وهو في ا

لسماء الرابعة .

وفي قصة بيذكرها كثير من المفسرين عن ابن عباس رضي الله عنه،
إنه سأل كعب الأحبار عن قوله تعالى:
" وَرَفَعْنَاهُ مَكَانًا عَلِيًّا"
فقاله إن ربنا أوحى لإدريس عليه السلام إنه بيعطيه كل يوم   مثل أجر بني آدم كلهم في زمانه، فإدريس عليه السلام كان يدعو الناس وكان مجتهد في الدعوة إلى الله 😊
فحب إدريس إنه يزود من عمره عشان يزيد من عمله وبالتالي أجره يزيد،
فكان لإدريس عليه السلام صاحب من الملائكة ،
فقاله على إللي ربنا أوحى له به، وقاله على رغبته إنه عايز عمره يزيد فكان عايز يكلم ملك الموت إنه يسيبه وما يقبضش روحه ويؤخر معاده 👌
فالمَلك أخذه وطلع بيه للسماء وهم طالعين قابلوا ملك الموت نازل واتقابلوا في السماء الرابعة فأخبر الملك صاحب إدريس عليه السلام ملك الموت بالحكاية فقاله ملك الموت وأين إدريس؟ 🤔
فقاله معايا هنا فقال له ملك الموت : سبحان الله ! ربنا أمرني إني أقبض روحه في السماء الرابعة فتعجبت إزاي أقبض روحه في السماء وهو على الأرض فسأل المَلك صاحب إدريس : كم الباقي من عمر إدريس ؟
فقال ملك الموت : لم تبق له طرفة عين فنظر الملك على إدريس عليه السلام وكان على جناحه فلاقاه مات.
وده قول كثير من المفسرين في تفسير قوله تعالى:
" وَرَفَعْنَاهُ مَكَانًا عَلِيًّا"

●ملحوظة القصة دي من الإسرائيليات😁👆
أنا تعمدت أقولهالكم عشان اشرحلكم يعني إيه إسرائيليات وحكمها إيه عندنا في الإسلام 😊

□الإسرائيليات معناها : الأخبار والروايات المنقولة عن بني إسرائيل، يعني بني إسرائيل عندهم معلومات وأخبار من الأمم إللي فاتت من بداية آدم عليه السلام وحتى بعثة رسول الله صلى الله عليه وسلم.

■حكمها إيه طيب😁
حكمها إننا لا نصدقها ولا نكذبها  لقوله صلى الله عليه وسلم: "لا تصدقوا أهل الكتاب ولا تكذبوهم"
لكن يجوز إننا نقول الأخبار والروايات دي من باب الوعظ والنصح ومن غييييير ما نجزم إنها صحيحة لو مفيش دليل على إنها باطلة 👌
لقوله صلى الله عليه وسلم: "حدثوا عن بني إسرائيل ولا حرج"

☆الإسرائيليات ثلاثة أقسام 👌
الأول: إنها نفس إللي في القرآن والسنة وده نصدقه ونقوله عادي😉
الثاني: ما يكذبه القرآن أو السنة وده يجب علينا إننا نُكذبه 😊
الثالث بأى ده إللي بنتكلم فيه😁
وهي أخبار وأحداث وروايات...القرآن لم يصدقها ولم يكذبها فدي عادي نقولها من باب الإستئناس وإننا نعرف معلومة لكن من غير ما نصدقها ولا نكذبها 👌

¤طيب ياحجة إنتي بتقوليلنا الكلام ده ليه🙄
أولا :عشان يكون عندكم علم بيها 😉
لأن في كثير من الناس ميعرفوش يعني إيه إسرائيليات وأول ما يسمعوا الكلمة يتخضوا يفكروها حاجة وحشة😅
فدي معلومة هتفيدكم إن شاء الله 😊

ثانيا: كثير جدا من المفسرين بيستعينوا بالإسرائيليات إللي هي القسم الثالث دي في تفسير بعض آيات القرآن زي ما حكينا قصة إدريس عليه السلام وشرح آية
" وَرَفَعْنَاهُ مَكَانًا عَلِيًّا"
لأن مفيش معلومات واضحة مفصلة عن معنى الآية ولا إزاي مات إدريس عليه السلام عشان كده عبد الله بن عباس ترجمان القرآن -رضي الله عنه- سأل كعب الأحبار إللي كان عالم من أهل الكتاب وأسلم وكان عنده أخبار ومعلومات كتير 

ياترى بعد موت إدريس عليه السلام الناس فضلت على التوحيد ولا غيروا ؟
ومين هو أول رسول على وجه الأرض وإيه قصته؟

ده إللي هنعرفه في الجزء الجاي إن شاء الله 

التعليقات (1)
Loaa

2022-09-04 05:10:50

احسنت
الرجاء تسجيل الدخول لتتمكن من التعليق
مقالات مشابة
...إخلاء مسئولية: جميع المقالات والأخبار المنشورة في الموقع مسئول عنها محرريها فقط، وإدارة الموقع رغم سعيها للتأكد من دقة كل المعلومات المنشورة، فهي لا تتحمل أي مسئولية أدبية أو قانونية عما يتم نشره.