حكايه نبي الله سيدنا سليمان عليه السلام

كل الانبياء ربنا وهب لهم معجزات تميزهم عن باقي البشر عشان النبي يحس بالطمأنينة والثقه هو وبينشر الدعوه وكمان عشان الناس يكون عندها ايمان واقتناع بنبيهم..

 هنتكلم  فيها عن سيدنا سليمان

سيدنا سليمان هو ابن سيدنا داود عليهما السلام وليه تمنتاشر اخ ولد وله اخت بنت وحيده..وأمه هي بثبشع بنت إليعام

إليعام ده كان قريب جدا من الملك داود وأحد رجاله ومش بس كده لا كمان ابوه الي هو جد بثبشع كان من ضمن المستشارين المقربين من سيدنا داود..خلفت بثبشع سيدنا سليمان في مدينة اورشليم في القدس الفلسطينية سنة ٩٨٥ قبل الميلاد تقريبا وكان بالنسبه لسيدنا داود هبه من عند ربنا بالرغم أن عنده اولاد ذكور قبل كده ولكنه حس أن سيدنا سليمان هيكون مختلف وده الي حصل فعلا.

(وَوَهَبْنَا لِدَاوُودَ سُلَيْمَانَ نِعْمَ الْعَبْدُ إِنَّهُ أَوَّابٌ)
[ سورة ص: 30]

انت متخيل أن ربنا بعظمته يقول عليك انك نعم العبد.
وبعد فترة كبر سيدنا سليمان وشاف والده كان بيحكم ازاي بين الناس بحكمته وعدله.. وفي يوم راح رجلين لسيدنا داود عشان مشكله حصلت بينهم وهي أن الشخص الاولاني عنده ارض بيزرعها والتاني عنده غنم وللاسف الغنم دخلت علي أرض الشخص الاولاني وكلت الزرع كله وهنا بدأت تظهر حكمة سيدنا سليمان لما استأذن من سيدنا داود أنه يقول رأيه في المشكله دى وكان راي سيدنا سليمان أن الراجل صاحب الأرض ياخد الغنم ويستفاد من لبنهم وصوفهم وخيرهم كله لحد ماصاحب الغنم يزرع الأرض لصاحبها وترجع زي ماكانت وساعتها يقدر يسترد الغنم بتاعه..وفعلا سيدنا داود امر بتنفيذ الحكم الي حكم بيه سيدنا سليمان وده ظهر في قوله تعالي

فَفَهَّمْنَاهَا سُلَيْمَانَ ۚ وَكُلًّا آتَيْنَا حُكْمًا وَعِلْمًا ۚ وَسَخَّرْنَا مَعَ دَاوُودَ الْجِبَالَ يُسَبِّحْنَ وَالطَّيْرَ ۚ وَكُنَّا فَاعِلِينَ (79)سورة الأنبياء

ومن هنا ورث سيدنا سليمان من أبوه الحكمه وبقي ليه شأن كبير جدا زي سيدنا داود..
ده غير حكمته في الحكم بين اتنين ستات كان سايببن أولادهم في مكان وهما بيرعو الغنم والذئب اكل ولد منهم وكل واحده فيهم بتقول أن الي الذئب اكله ده مش ابنها وان ابنها هو الي عايش ف أمر سيدنا سليمان الي حواليه أنهم يجيبو سكينه عشان هيشق الطفل الي عايش نصين ويدي كل واحده منهم نص وهنا قالت واحده منهم لا خلاص ماتقتلوش هو ابنها هي ومش ابني وهنا عرف سيدنا سليمان أن الولد ابن الست الي قالتله بلاش تقتله لان ظهرت عليها مشاعر الامومه وخافت علي ابنها أنه يموت وحكم سيدنا سليمان بأن الولد هو ابنها وده يدل علي حكمة وذكاء سيدنا سليمان.

وفي يوم توفي سيدنا داود في وسط بيته بدون اي مرض او اي نوع من أنواع التعب ووقت تغسيله وتكفينه اشتدت الشمس..فأمر سيدنا سليمان الطير أنهم يعملو مظله باجنحتهم ليستظل من شدة الشمس وفعلا الطيور عملت بأجنحتها مظله لدرجة أن الطيور منعت دخول الهوا والأرض ضلمت جداا فأمرهم سيدنا سليمان أنهم يغيروا اتجاه المظله وتكون في اتجاه الشمس بس..ومن هنا قوم سيدنا سليمان اكتشفو قدرة سيدنا سليمان في أنه بيتكلم مع الطيور وعارف لغتهم ومن هنا ورث سيدنا سليمان الملك وكبرت المملكه وبقت اقوي وبقي جيشها واكبر واقوي من الاول لان الجيش بقي عباره عن انس وجن وطيور وحيوانات..يعني جيش كبير وعظيم وصعب اي حد يخش معاه حرب ويغلبه من قوته بس بالرغم من كل ده كان سيدنا سليمان جواه رحمه وخير وطيبه وعدل ورثهم عن والده..لدرجة أن يوم كان سيدنا سليمان ماشي مع الجيش بتاعه سمع صوت نمله خايفه جدا منه ومن الجيش بتاعه وأنهم يموتوهم من غير مايخدو بالهم..فالنمله ندهت علي باقي النمل وقالتاهم ادخلوا بيتكم بسرعه لان سليمان جاي بجيشه وممكن يدوسو علينا من غير مايقصدو

حَتَّىٰ إِذَا أَتَوْا عَلَىٰ وَادِ النَّمْلِ قَالَتْ نَمْلَةٌ يَا أَيُّهَا النَّمْلُ ادْخُلُوا مَسَاكِنَكُمْ لَا يَحْطِمَنَّكُمْ سُلَيْمَانُ وَجُنُودُهُ وَهُمْ لَا يَشْعُرُونَ (18) سورة النمل

ولما سيدنا سليمان سمع النمله وهي بتكلم باقي النمل ابتسم وشكر ربنا علي النعمه الي انعم بيها عليه وميزو بيها عن باقي البشر والي خلته يتواصل مع الجن والحيوانات والطيور ويعرف لغتهم

فَتَبَسَّمَ ضَاحِكًا مِّن قَوْلِهَا وَقَالَ رَبِّ أَوْزِعْنِي أَنْ أَشْكُرَ نِعْمَتَكَ الَّتِي أَنْعَمْتَ عَلَيَّ وَعَلَى وَالِدَيَّ وَأَنْ أَعْمَلَ صَالِحًا تَرْضَاهُ وَأَدْخِلْنِي بِرَحْمَتِكَ فِي عِبَادِكَ الصَّالِحِينَ(19) سورة النمل

وكان سيدنا سليمان بيحب الخيل بطريقه مش طبيعيه لدرجة أنه في يوم كان بيلعب مع الخيل وفاتته الصلاه ودي اول مره تحصل..زعل سيدنا سليمان جدا أن الخيل خلاه ينسي صلاته وهنا اختلف العلماء عن تفسير الي عملة سيدنا سليمان مع الخيل بتاعته.اول تفسير بيقول أنه دبح الخيل وتبرع بلحومها للفقراء وتاني تفسير بيقول أنه مسح علي الخيل بايده وقعد يستغفر ربنا

(رُدُّوهَا عَلَيَّ فَطَفِقَ مَسْحًا بِالسُّوقِ وَالْأَعْنَاقِ)
[ سورة ص: 33]

وكمان في قصه مشهوره جدا معظمنا يعرفها وهي قصة سيدنا سليمان مع الهدهد..في يوم سيدنا سليمان كان موجود في مكان ما في الأرض والمكان ده مافيهوش مايه خالص فسأل سيدنا سليمان عن الهدهد وملقهوش وقال ساعتها أن الهدهد لو جه ومعندوش سبب مقنع لغيابه وقت ما انا احتجتله هعذبه او ادبحه..والسؤال هنا ليه سيدنا سليمان سأل مخصوص عن الهدهد وفي التوقيت ده بالذات

انا هقولك ياصديقي..
يعتبر الهدهد من اذكي الطيور واجملها وكمان ممنوع صيده أو اكله غير أن الهدهد له قدره غريبه وعجيبه في اكتشاف اماكن المايه في باطن الأرض وعن بعد ودي قدرة مش موجوده عند اي طائر تاني عشان كده يعتبر الهدهد هو وسيلة سيدنا سليمان لمعرفة اماكن المايه في الأرض ولما رجع الهدهد لسيدنا سليمان.سأله كنت فين رد عليه الهدهد وقاله أنه كان في سبأ وان في ملكه هناك هي وقومها بيعبدو الشمس وعندها جيش قوي جدا..رد عليه سيدنا سليمان وقاله هنشوف انت بتكدب ولا بتقول الحقيقه خد الرساله دي وارمهالها ونشوف ردهم وفعلا الهدهد رمي.الرساله لملكة سبأ ومشي علي طول وطبعا هي استغربت ازاي هدهد يعمل كده وبعتت المستشارين بتوعها وقالتلهم في رساله جتلي من هدهد ومكتوب فيها  

( إِنَّهُ مِنْ سُلَيْمَانَ وَإِنَّهُ بِسْمِ اللَّهِ الرَّحْمَنِ الرَّحِيمِ أَلا تَعْلُوا عَلَيَّ وَأْتُونِي مُسْلِمِينَ ) 
[ سورة النمل: 30]

فقالتلهم انا مش باخد قرار من غير ما اخد رايكم وان في ملك اسمه سليمان بعتلي رساله مع هدهد وعقيدته غير عقيدتنا  وعاوزنا نخضع ليه وعاوز اعرف رايكم..بس المستشارين بتوعها قالولها احنا جيشنا قوي جدا ونقدر نحارب اي جيش بس القرار ليكي في الاخر ولما فكرت ملكة سبأ في موضوع أن الهدهد جاب الرساله ومشي وكمان الرساله فيها ثقه كبيره جدا كمان خافت أنها تخش حرب مع جيش سليمان وتخسر الحرب دى فقررت أنها تبعت هديه لسليمان مقابل أنه يتراجع عن قراره وفي نفس الوقت تعرف من المرسال الي هيروح شكل الجيش والعدد بتاعه وكده.. وفعلا بعتت هديه لسيدنا سليمان لكنه قابل الموضوع بالرفض وقال للمرسال الي جايبله الهديه انتو باعتينلي فلوس كنوع من الرشوه عشان مخشش الحرب دي..انا الي ربنا مدهوني وكارمني بيه افضل كتير من الي عندكم ارجع لهم وقولهم هنيجي بجيش ميقدروش عليه وهنخرجهم من مملكتهم بشكل مهين..وسيدنا سليمان كان عنده يقين أنهم مستحيل يخشو معاه حرب خصوصا بعد مالمرسال هيروح ويحكيلهم عن الي شافه وبعد مالمرسال مشي سيدنا سليمان سأل الي حواليه مين يقدر يجبلي العرش بتاعها فرد عليه عفريت من الجن وقاله انا اقدر اجبهولك قبل ماتتحرك من مكانك ده

قَالَ عِفْرِيتٌ مِّنَ الْجِنِّ أَنَا آتِيكَ بِهِ قَبْلَ أَن تَقُومَ مِن مَّقَامِكَ ۖ وَإِنِّي عَلَيْهِ لَقَوِيٌّ أَمِينٌ
[ سورة النمل: 33]
..استني سيدنا سليمان حد تاني يتكلم
ويقول هيعرف يجيبه في اد ايه ومحدش اتكلم فرد سيدنا سليمان علي العفريت وقاله أن اقدر اجيبه قبل ماعينك ترمش وده بسبب ثقة وإيمان سيدنا سليمان بربنا سبحانه وتعالي وأنه عارف لو طلب اي طلب من ربنا هيستجاب ليه في ثواني وفعلا دعا سليمان ربه وفي لحظه كان العرش قودامه وشكر ربنا علي النعمه الي انعم بيها عليه..وامر سيدنا سليمان أنهم يغيروا في شكل العرش عشان يعرف مدي ذكائها وأنها هتاخد بالها أن ده عرشها ولا لا..وفعلا بعد وقت قصير دخلت ملكة سبأ مملكة سيدنا سليمان وسألها هل ده عرشك قالتله كأنه هو وده يدل علي ذكائها الشديد.

فَلَمَّا جَاءَتْ قِيلَ أَهَٰكَذَا عَرْشُكِ ۖ قَالَتْ كَأَنَّهُ هُوَ ۚ وَأُوتِينَا الْعِلْمَ مِن قَبْلِهَا وَكُنَّا مُسْلِمِينَ 
[ سورة النمل: 42]
وبعد كده حاول سيدنا سليمان يقنع ملكة سبأ أن عبادتها للشمس حاجه مش صح وان الشمس مخلوق زي مخلوقات كتير ربنا خلقها وان هي لازم تغير عقيدتها وتبقي زي عقيدة سيدنا سليمان..وبعد كده خدها سيدنا سليمان ودخل مكان كبير كان أمر الجن أنهم يبنوه ولما دخلت شمرت هدومها وهي بتعدي لانها كانت فاكره أن الممر ده مليان مايه..بس سيدنا سليمان قالها ده ازاز مصنوع بطريقه معينه يبين للشخص الي ماشي عليه أنه ماشي علي مايه وبعد ماشافت ملكة سبأ سليمان وقدرته ومعجزاته امنت بعقيدة سيدنا سليمان..

( قَالَتْ رَبِّ إِنِّي ظَلَمْتُ نَفْسِي وَأَسْلَمْتُ مَعَ سُلَيْمَانَ لِلَّهِ رَبِّ الْعَالَمِينَ ) 
[ سورة النمل: 42]
واختلف المفسرين في احتمالية أن سيدنا سليمان يكون اتجوز ملكة سبأ ولا لا ومافيش تفسير واضح وصريح يوضح هل فعلا اتجوزها ولا لا..وفي آخر يوم في حياة سيدنا سليمان كان مكلف الجن بأعمال صعبه فضلو شغالين فيها فتر كبيره اووي وكانو كل شويه يبصو علي سيدنا سليمان يشوفو هل هو بيراقبهم ولا لاا وكان سيدنا سليمان متكئ علي عصايته يعني ساند عليها وباصص للأرض لحد ماتوفي سيدنا سليمان وهو ساند علي عصايته والجن ميعرفوش أنه مات وده هنا يثبت لينا أن الجن ميعرفوش الغيب لأنهم لو يعرفو الغيب كانو عرفو أن سيدنا سليمان مات ومكنوش كملو في الشغل الصعب الي كانو بيعملوه..لحد ماجت كائنات صغيره من الأرض واكلت العصايه الي كان ساند عليها سيدنا سليمان ووقع وهنا عرف الجن أن سيدنا سليمان توفي وزعل الناس جدا علي وفاة سيدنا سليمان ومحدش ورث منه حكمته وعلمه وقدرته علي تسخير الجن والطيور والحيوانات لكن الشياطين والجن اضلو الناس وحاولوا يقنعوهم أن أي حد ينفع يبقي زي سيدنا سليمان وأنه كان ساحر وسخرهم لخدمته عن طريق السحر وهما نفسهم عارفين ازاي يعلمو الناس السحر ده عشان يبقو زي سليمان واقوي كمان..
لكن ربنا سبحانه وتعالي برأ سيدنا سليمان في كتابه لما قال..

وَاتَّبَعُواْ مَا تَتْلُواْ الشَّيَاطِينُ عَلَى مُلْكِ سُلَيْمَانَ وَمَا كَفَرَ سُلَيْمَانُ وَلَكِنَّ الشَّيْاطِينَ كَفَرُواْ يُعَلِّمُونَ النَّاسَ السِّحْرَ وَمَا أُنزِلَ عَلَى الْمَلَكَيْنِ بِبَابِلَ هَارُوتَ وَمَارُوتَ
[ سورة البقرة: 102]

وده دليل أن سيدنا سليمان مكانش ساحر ولا استخدم السحر ولاعمره اذي حد ولا سعي لاذية حد وده بشهادة ربنا سبحانه وتعالي.