الحلقة واحد وثلاثين من قصة فارس الاسلام

الحلقة الواحد والثلاثين من قصة #فارس_الاسلام

بعد ما المبايعة تمت علي خير مع ال12 رجل من يثرب
رجعوا بلدهم تاني وهما ناوين يكونوا من افضل الناس نصره للنبي ولـ دين الله عز وجل'
ومن يومها بقى لقبهم في يثرب اللي هي المدينة "الانصار"
لانهم فعلا هما اللي نصروا النبي صل الله عليه وسلم
واسلامهم فرق كتير في قوة دين الله الحق !!
و النبي صل الله عليه وسلم بعت معاهم واحد من المسلمين اللي من مكة لـ يثرب "اللي هي المدينة حاليا"
زي سفير كده للاسلام ،بس مكانش مجرد سفير وبس
لااااا
ده كان ليه ادوار كتيره جدا
اثرت بشكل ايجابي في وضع وقوة الدين الجديد  !
السفير ده كان "مصعب بن عمير "
وكان من اهم ادواره -رضي الله عنه-

1- تعليم الاسلام للمسلمين هناك.

2- انه بمثابة قدوة وصورة مهمة للناس عشان يتبعوه.

3-انه يأسس جيش بشكل غير مباشر، لنصرة الدين والنبي والبلد .

4-دراسة وضع البلد "اللي هي يثرب"
من اوضاع امنية وعسكرية واقتصادية
عشان بعد كده هتكون هي الاساس، وهتكون مركز الاسلام بعد كده، وكمان هتكون دار الهجرة للمسلمين.

وطبعا دي مكانتش مهمة سهلة ابدا،  وكانت عاوزه حد يكون ادها
عشان كده النبي صل الله عليه وسلم اختار
الصحابي الجليل -مصعب ابن عمير - رضي الله عنه “

واختيار النبي صل الله عليه وسلم ليه مكانش اختيار عشوائي -حاشا وكلا
النبي صل الله عليه وسلم كان شديد الحكمة
عنده بعد نظر بشكل لا يصدق
وفطنة وذكاء محصلوش
عشان كده كان بيدرس اي قرار قبل ما ياخده
والاختيار ده كان ليه اسباب
ومن اهم الاسباب كان:
1- ان مصعب ابن عمير كان من اعلم الصحابة ،واحفظهم للقرءآن ، ومش بس كده
لااا،،، ده كان من اوائل الناس اللي اسلمت ،وخاض التجربة من اولها
وشاف المعاناه اللي كانت في الاول، كمان عارف امته نزلت كل آية من القرءآن وايه سبب نزولها ومعناها كمان.،
فكان رضي الله عنه عنده خلفيه كبيره من العلم ، لان طبعا لو حد جه سأله سؤال،  لازم يكون عارف الاجابة!
والاجابة هيعرفها طبيعي لما يكون حافظ وفاهم القرءآن
لان مفيش مجال انه يروح يسأل النبي بعد اي سؤال يتسأل!
ده بين مكة والمدينة 500كيلو متر والوسيلة في السفر
كانت الجمل
فلازم لازم يكون اللي هيقعد معاهم يكون عالم بالعلوم الدينية بالقدر الكافي اللي تعلمهم بدون الرجوع للنبي!

2-كان مصعب ابن عمير هادي وذكي جدا وعنده صبر وسعة صدر فظيعه
ودي طبعا من اهم الصفات اللي لازم يتميز بيها الداعيه
خصوصا بقى لو كان السفير الاول للاسلام “

3-كان مصعب ابن عمير من اشراف مكة ،كان من بني عبد الدار
اللي كان معاهم مفتاح الكعبه
وكانوا بيورثوه من بعض
وده كان مهم جدا عشان اهل يثرب يحترموه ويحترموا كلامه ،ومايستهزأوش بيه وبكلامه لو كان عبد ضعيف مالهوش نسب ولا اصل!

4-مصعب ابن عمير كان من اغنياء مكة، وده كان كفيل انه يخلي الغني يدخل الاسلام قبل الفقير، ويكون قدوة عظيمة للاغنياء
وان المال ده اخر حاجة يفكر فيها
وانه ساب كل مايملك من اجل الدعوه الى الله، ونصرة دين الله ونبيه!

5-كان اختيار مصعب بهذه الصفات، علامة واعلان واضح لاهل مكة والمدينة
ان الدين ده مش ثورة من الفقراء على الاغنياء
لاااا
ده دين يدخله الغني قبل الفقير ، ومالهش علاقة ابدا بوضعك المادي او الاقتصادي! !

6-ان بعده عن النبي المسافة دي كلها
دليل على ان المسلم الحق ،مايهموش الدنيا، وانه بيعبد الله وحده، وان الدنيا دي اخر همه
سواء كان مع النبي او بعيد عنه!

7-ان فيه ناس بتفتتن بالكرسي والزعامة
لكن مصعب ساب الكرسي والزعامة وراح يتغرب لنصرة دين التوحيد ونبي الله ، فلو كان يريد الزعامة
ماكانش ترك مكة وسافر كده ...

8-ان مصعب كان من الصحابة اللي هاجروا الهجرتين الاولى والثانيه للحبشة
اللي هي اثيوبيا حاليا
والنبي صل الله عليه وسلم دعاه من الهجره عشان المهمة دي!
وطبعا ده خلاه يكسب خبرة ومهارة في التعامل مع الاغراب
خصوصا ان اهل الحبشة كانوا اجانب ميعرفوش عربي
وكانت ديانتهم مختلفة تماما عن اهل مكة وعن السعودية كلها!
ومع ذالك قدر يعيش ويتواصل معاهم ،وده خلاه عنده مهارة التواصل مع الآخرين!

9-هجرة مصعب للحبشة مرتين علمته الغربه، وانه بقي قادر علي بعد اهله وبلده واحبابه، ويعيش غريب
لان الهجرة للمدينة مكانتش لسه معروفه هتقعد سنة والا اتنين والا اكتر من كده، المهم انه متعود عالبعد!

10- كان عمر مصعب ابن عمير 35 سنة، وده كان عمر مناسب جدا
ياعني لا هو شاب طايش متهور
ولا شيخ مسن مش قادر يتحرك ويقضي المهمه دي...
يتبع....