قصة أصحاب الكهف

هل فكرت قبل كده ان ممكن حد  ينام مئات السنين  وبعدها يصحي  وكأن مفيش أي حاجة حصلت؟ 

الكلام ده مش خيال دي قصة حقيقية ربنا سبحانه وتعالى حكاهالنا في القرآن الكريم وهي قصة أصحاب الكهف

قال الله تعالي ﴿أَمْ حَسِبْتَ أَنَّ أَصْحَابَ الْكَهْفِ وَالرَّقِيمِ كَانُوا مِنْ آيَاتِنَا عَجَبًا إِذْ أَوَى الْفِتْيَةُ إِلَى الْكَهْفِ فَقَالُوا رَبَّنَا آتِنَا مِنْ لَدُنْكَ رَحْمَةً وَهَيِّئْ لَنَا مِنْ أَمْرِنَا رَشَدًا فَضَرَبْنَا عَلَىٰ آذَانِهِمْ فِي الْكَهْفِ سِنِينَ عَدَدًا ثُمَّ بَعَثْنَاهُمْ لِنَعْلَمَ أَيُّ الْحِزْبَيْنِ أَحْصَىٰ لِمَا لَبِثُوا أَمَدًا )

أصحاب الكهف دول فتية آمنوا بربنا ورفضوا إنهم يعبدوا غيره  وكانوا متمسكين بدينهم جدا رغم إنهم كانوا عايشين وسط ناس مش مؤمنين بالله 

ولما حسوا ان إيمانهم بقا في خطر وانهم ممكن يتعرضوا للأذى قرروا يبعدوا عن قومهم ويلجأوا للكهف 

قال الله سبحانه وتعالى عنهم  (إِنَّهُمْ فِتْيَةٌ آمَنُوا بِرَبِّهِمْ وَزِدْنَاهُمْ هُدًى) 

يعني كانوا شباب آمنوا بالله وربنا زادهم هداية وثبات

طب إيه اللي حصل لما دخلوا الكهف؟

دعو ربنا وقالوا ( رَبَّنَا آتِنَا مِنْ لَدُنْكَ رَحْمَةً وَهَيِّئْ لَنَا مِنْ أَمْرِنَا رَشداً) 

يعني يا رب ارحمنا ودبر امرنا واهدينا للطريق الصح

وربنا استجاب لدعائهم وأنامهم نوم طويل جدااا 

فضلو نايمين في الكهف ثلاثمائة سنين وازدادوا تسعًا  يعني 309 سنة 

وخلال السنين دي ربنا كان حافظهم وكان بيقلبهم ذات  اليمين وذات الشمال علشان أجسامهم تفضل محفوظة واللي يشوفهم كان بيفكر إنهم صاحيين 

(وَتَحْسَبُهُمْ أَيْقَاظًا وَهُمْ رُقُودٌ ۚ وَنُقَلِّبُهُمْ ذَاتَ الْيَمِينِ وَذَاتَ الشِّمَالِ ۖ وَكَلْبُهُم بَاسِطٌ ذِرَاعَيْهِ بِالْوَصِيدِ ۚ لَوِ اطَّلَعْتَ عَلَيْهِمْ لَوَلَّيْتَ مِنْهُمْ فِرَارًا وَلَمُلِئْتَ مِنْهُمْ رُعْبًا)

طب إيه اللي حصل اول لما صحيووا؟

بعد الـ 309 سنة ربنا بعثهم من نومهم وصحاهم

ولما صحييوا ماكانوش عارفين إن كل الوقت ده عدى وبصوا لبعض وسألوا : كم لبثتم؟ يعني نمنا قد ايه؟

فقالوا انهم ممكن يكونوا نامو يوم أو جزء يوم

وبعدها قالوا  يختاروا واحد منهم وادوه فلوس وقالوله يروح يشتري أكل من المدينة بس يكون حذر جدًا  ومايخليش حد ياخد باله منه أو يعرف هما مين

وهنا حصلت المفاجأة الكبيرة

الفتى دخل المدينة وبدأ يتعامل مع الناس بس  اكتشف ان الدنيا كلها اتغيرت الناس مش زي الناس اللي كان يعرفها وكل حاجة حواليه بقت مختلفة والفلوس اللي معاه كانت قديمة جدا فبدأ الناس يستغربوا 

وهنا الموضوع اتكشف والناس عرفوا إن الفتي ده واحد من الفتية اللي اختفوا من زمان

قال الله تعالي( وَكَذَلِكَ أَعْثَرْنَا عَلَيْهِمْ لِيَعْلَمُوا أَنَّ وَعْدَ اللَّهِ حَقٌّ وَأَنَّ السَّاعَةَ لَا رَيْبَ فِيهَا)

و الله اظهر امرهم للناس عشان يعرفوا ان الله قادر يبعث الناس بعد موتهم 

 ايه هو  أهم درس اتعلمناه من قصة أصحاب الكهف؟

 اهم درس هو الثبات على الإيمان والثقة بالله في وقت الشدة وان الانسان ممكن يمر بظروف صعبة بسبب تمسكه بالحق لكن عليه أن لايفقد ثقته بالله