يعني إيه دين؟
يعني إيه دين؟
إيه هو الدين؟
الإنسان من بدايته وهو دايما بيشوف حاجة يعبدها ،حاجة يقدسها ،وده ليه أسباب كتير ،زي:الإحساس بالأمان لأن الإنسان لما بيكرر طقس مثلا زي الصلاة في حياة مليانة غموض ووحشية وحاجات غريبة بيحس أنه واقف على أرض صلبة ،وزي مثلا المعنى والهوية الإنسان بيدور على معنى يتجاوز بيه لحظته الحالية يعني لما بيقدس شيئ أعظم منه بيحس أنه مرتبط بشيئ أعظم منه وأعظم من كل اللي حواليه من تغيرات وناس وغموض وبيحس أنه له هوية في الكون ده وإنتماء وده لأن الإنسان أصلا عنده إحتياج للإنتماء وده من أخطر أنواع الإحتياج.
يبقى نقدر نستنتج إن الدين هو أسلوب الحياة اللي بتعيش بيه في الكون والدنيا دي عشان تحس بالانتماء والأمان والطمأنينة بسبب إرتباطك بشيئ أعظم من الكون ده .
يعني إيه دين؟
خلينا متفقين إن الكون اللي إحنا عايشين فيه ده له خالق هو اللي خلقه ،طيب تمام .
خلينا نتخيل إن أنت موظف في شركة ،فالمدير قالك تيجي الشركة الساعة كذا وتمشي الساعة كذا وتلبس اللبس ده وهكذا أشياء ،هل أنت هتعترض ولا هتعمل اللي بيقولك عليه علطول .
طيب دلوقتي فيه إله خلق هذا الكون اللي إحنا عايشين فيه، الإله ده عايزنا نعبده عشان هو خلقنا وإدانا جسم ورزق وعقل ميزنا بيه على باقي المخلوقات ،مش المدير أنت بتسمع كلامه عشان يديلك المرتب آخر الشهر ،ربنا قالك تعبده عشان أنت متتعذبش وتنول رضاه وتتجنب غضبه ولما ربنا يرضى عنك هيكافأك المكافأة الكبرى ،طيب تمام .
أنت بتحب الناس تعاملك بطريقة معينة بأسلوب معين ،ولله المثل الأعلى ،ربنا قالك تعبده بطريقة معينة اللي هي الدين ،ولو ركزت هتلاقي إن أنت اللي محتاج تعبده عشان الأسباب اللي قلناها فوق ،لأن محدش هيحسسك بالأمان ولا إنك واقف على أرض صلبة غير أعظم من في الكون وخالقه وخالقك ،يبقى الدين هو أسلوب الحياة اللي بتعيش بيه وبيكون متضمن أسلوب العبادة اللي بتعبد بيه ربنا عشان يرضى عنك وتحس أنت بالأمان والطمأنينة وتشعر بالراحة النفسية وراحة البال وانشراح الصدر لما تكون منتمي للي قالك وهو خالق الكون وخالقك لا تقلق
بيقولك أنه ضامن ليك الرزق بس برضو بيقولك أنه خالقك للعبادة أوعى تنشغل في الدنيا اللي جاية من الدنو وخلي أسلوب حياتك مُرضي لله يعني ببساطة خلي دينك مرضي لله عشان تكسب الآخرة صاحبة الحياة الخالدة اللامتناهية .
يا سلام على الراحة النفسية لما تسمع الكلام ده من خالق الكون وخالقك .
في ديانات كتيرة ،أتبع أنهي واحدة فيهم؟
فاكر المثال بتاع الشركة ،نفس الموضوع ،المدير جه قالك إلبس اليونيفورم ده ،وبعد فترة قالك تلبس واحد تاني وبعد فترة كمان قالك تلبس واحد كمان
ربنا سبحانه وتعالى نزل تلات ديانات سماوية ،آخر حاجة نزلت على إيد سيدنا محمد صلى الله عليه وسلم هي الديانة الإسلامية ،وخليك عارف إن كل الديانات كانت تدعو لعبادة الله الواحد الأحد،طيب ،لما ربنا يقولك أعبدني بأسلوب الحياة ده أو بالدين ده أنت مش هتفرق معاك تعبده إزاي أنت تعبده باللي قالك تعبده بيه لأنك المفروض في الأول والآخر بتعبد ربنا .
لو تلاحظ إني في الكلام اللي فات كنت بقول الدين الدين معرفة يعني معرف بالألف واللام لأن الدين عند الله هو الإسلام ،وأي حاجة تاني عند ربنا مش مقبولة .
وغير كده كل الديانات اللي فاتت كانت تمهيد للإسلام يعني الإسلام مبدأش من عند النبي صلى الله عليه وسلم لا ،كل الأنبياء كانوا بيدعوا إليه ولكن بطرق مختلفة تتوافق مع الزمان والمكان اللي هما فيه ،والإسلام جمع كل الديانات اللي فاتت فيه ،يعني الإسلام هو الصورة الكاملة والأخيرة من كل ما دعا إليه كل الرسل السابقين لسيدنا محمد صلى الله عليه وسلم .
الديانات اللي قبل الإسلام صح ولكن في وقتها قبل ما سيدنا محمد صلى الله عليه وسلم ينزل بالصورة الكاملة والأخيرة من الإسلام الديانة الوحيدة المقبولة عند الله سبحانه وتعالى .
عارف زي مثلا تليفونك مثلا هو سامسونج ،فينزل كل فترة تحديث يواكب اللي بيحصل ،نفس الكلام كل الديانات اللي فاتت كانت تمهيد للإسلام والإسلام اللي نزل بيه سيدنا محمد صلى الله عليه وسلم هو الصورة الكاملة والأخيرة من الإسلام هي الصورة اللي مش هتتغير أبدا ولا هينزل بعدها ديانة تاني وهي الوحيدة المقبولة عند الله سبحانه وتعالى
أخيرا ،خليك عارف إنك في مهمة وهي إنك تعبد ربنا يعني كل الخروج والسهر والأمل والشر والفسحة والفخر وهكذا أشياء ما هي دون العبادة متاع قليل لأنه في الحياة الدنيا
ركز مع ربنا وخليك حاطه في أهم حاجة عندك لأن هو اللي أحن عليك من أمك وأبوك .
السلام عليكم ورحمة الله وبركاته.
