الثقة والايمان و المحبة او من عدمن

منقولة من احدى صديقاتي تفول في مرة شوفت بنت جميلة جدًا جدًا بتحاول تنتحر من فوق كوبري ، جريت عليها بسرعة كبيرة أوي ، وبدأت أقرب منها وحسيت إنها خايفة ومترددة فقولتلها :

= مالك يابنتي ، ليه بتعملي كدة..؟
" بصِتلي وهي مخضوضة وعيطت بصوت عالي وزي ما تكون شافتني طوق نجاة ليها "
- خطيبي سابني وخطب واحدة جميلة ، وكل ده علشان ربنا خلقني وحشة !!
"بصيتلها وضحكت بصوت عالي"
- إنت بتضحك عليا !!

= يابنتي ماهو عنده حق بصراحة هو رِضي بيكي إزاي من الأول أصلًا هو كان أعمي ولا إيه ؟!!
" بعد ما سِمعت كلامي لاقيتها في أقل من ثانية مِن غير تفكير نطت وموتت نفسها، وصوت ضِحكي بقي أعلي وأعلي"
= مجنونة كانت جميلة جدًا بس قِلة إيمانها خلِتها شاكة في نفسها.
يلا عُمرها بقي.

ملامح وشي إتغيرت وعينيا بقت حمرا وبصيت لفوق وأنا متضايق وقولت بصوت عالي أوي :
= أنا أحسن منهم كلُهم أنا اللى عبدتك الأول ، أنا أذكىٰ وأرقىٰ ، أنا من نار لكن هُما من طين.
بعد كدة عينيا بقي ماليها الشر وكملت في طريقي لوحدي.
" حقيقي البشر دول محظوظين ، علي الرغم إن عُمرهُم قصير ، بس جمبهم ناس بتحبهم ومالية حياتهم".

وفي وسط ما أنا سرحان لاقيت أم قاعدة علي كرسي متحرك قدام البحر وإبنها واقف جمبها بيضحكوا وكان شايل عيل صغير في إيده عمال يعيط وسمعت الإبن وهو بيقول لأمه :
- هروح أجيبلك الدوا واجي بسرعة يا ماما ، مش هتأخر عليكي.
- ماشي يا حبيبي بس ماتتأخرش عليا.
- حاضر يا حبيبتي.
- ربنا يحفظك يابني ويكفيك شر الغفلة.
" استنيت شوية ولما لاقيته راجع مِن الصيدلة جت فرصتي"
قربت منه واحدة ، واحدة
= إبنك ده يا حبيبي ؟!
- أه يا عم الحاج إشمعنا ؟
= بيفكرني بـ إبني الله يرحمه ، علي فكرة أنا كنت زيك بالضبط فضلت أهتم بأمي كدة لحد ما غصب عني قصرت في حق إبني وتِعِب ومات مني ، ودلوقتي أنا عايش طول حياتي خايف أقابل ربنا بسبب اللي عملته.
"سِكِت شوية وقال :
- أنا فعلًا حاسس إني مقصر معاه أوي ، ومن يوم موت مراتي وأنا ابني في رقبتي والحِمل زاد عليا ، وعلي طول بيعيط وأنا أمي وخداني مِنُه معظم الوقت.
"طلعت من جيبي فلوس كتير كُلها ورق بـ 200 جنية"
= هقولك علي الحل وإدعيلي.
"بَص لإيدي وعينيه بدأت تِلمَع"
- قولي يا حاج.
= دول 10 آلاف جنية ، وديها دار مُسنين وخليها تعيش حياتها ، وإنت كمان عيش حياتك ، وكل أول شهر هديك زيُهم ، وخلي بالك من ابنك ليحصلك اللي حصلي.
" فضل مركز مع الفلوس وقال وهو متردد :
- بس.....  بس دي أمي برضو وممكن تزعل.
" بصيت لعينيه بِـ شر "
= الأيام هتنسيها وأكيد هتسامحك المهم إبنك المسكين اللي مالوش أم ده.
"مد إيده وخد الفلوس بكل طمع وقال :
- والله عندك حق.
"وراح علي أمه وبدأ صوتهم يكون عالي وأنا واقف بعيد بضحك ، لحد ما وقعت من علي الكرسي مُغمي عليها.
إبنها طلب الإسعاف وراح علي المستشفي ورُحت معاهم ، وبعد شوية الدكتور خرج وقال :
-البقاء لله جلطة في المُخ ، ومالحِقناش نعالِجها.
" حطيت إيدي علي كتفُه وضحكت وأنا فاتح بؤي"
= إبسِط ياعم أهو ربنا رَيَحك مِنها خالص.
"بصلي وعينيه حمرا وكلها دموع ندم هيعيش طول حياتُه يتعذب بسببها وقال:
- أنت مين ؟!! ، أنا عُمري ما شوفت حد مُجرم وكافِر زيك كدة.
"إديتلُه ضهري ومشيت وصوت عياطُه بقي عالي وقُلت :
= أنا ؟!!
أنا الفخ ، أنا لا كافر ولا مؤمن ، وعمري ما كنت قاتل ولا مُجرم ، أنا المصيدة اللي بيقع فيها الطماعين اللي زيك.
مش من شوية أمك قالتلك ربنا يكفيك شر الغفلة !!
أهو أنا بقي الغفلة دي.
وسيبتُه ومشيت لحد ما خرجت من المستشفي.
"حقيقي راجل مسكين باع أمه علشان شوية ملاليم !!
بس هو طماع ويستاهِل.
مايعرفش إني رُحت لأمه قبل ما أروحله وقولتلها إن إبنها بيكرهها وزهق منها ومن قرفها ، وإنها بَقِت حِمل تقيل علي قلبه ، وكل ما يقابل حد يشتكيلُه مِنها، وعاوز يوديها دار مُسنين علشان مابقاش مِستحمِل ، لحد ما عيطِت وقالتلي أنت كذاب وإن إبنها بيحبها ومستحيل يكون كدة.
فـ حبيت أثبِتلها إن كلامي صح.
حقيقي كانت طيبة وماتت بسببُه وكمان غضبانة عليه وهو هيفضل عايش طول حياتُه زي الأموات نصيبهُم كدة بقي أنا ماغصبتش حد علي حاجة".

وفجأة وأنا ماشي لفت إنتباهي بنت صغيرة واقفة وماسكة وردة في الجنينة ، قربت منها وقولتلها.
= اسمك إيه يا جميلة أنتي ؟
- نورهان.
= وماما فين يانورهان ؟
- بتجيبلي شوكلاتة وجاية.
= بتحبي ماما ؟
"ضحكت وهزت راسها وقالت :
- أوي أوي.
" طلعت من جيبي فلوس كتير"
= تاخدي دول تجيبي بيهم شوكلاتة كتير أوي وتكرهي ماما زي ما هي بتكرهك !
" راحِت راجعة لورا خطوة"
- لا ، أنت كذاب أنا بحبها وهي بتحبني.
"قربت مِنها"
= طب لو فيه ولد بيحبك وبيلعب معاكي كل يوم وراح سايبك علشان يلعب مع بنت أجمل منك هتعملي ايه ؟
- هقول لربنا إني بحبه وعاوزاه ييجي يلعب معايا تاني.
= بس انتي وحشة !
" راحِت راجعة لورا خطوة"
-  مش وحشة.
= لا وحشة.
- لا.
= وحشة.
- لااااااا
= وحشة ،. وحشة ، أنتي وحشة يا نورهان.
"قرَبِت مني وعينها مليانة دموع وقالت بكُل جُرأة :
- ماما قالتلي ربنا مابيخلقش حد وحش.
" المرة دي أنا اللي رجعت لورا ومشيت خطوتين لقدام ، لإنها بتحب أمها بجد زي ما أم الولد اللي كانت علي كرسي بتحبه وماكنتش مصدقاني لما قولتلها إن إبنها بيكرهها.
وكمان ثقتها في نفسها كبيرة وإيمانها قوي ماصدقتنيش لما قولتلها إنتي وحشة زي البنت اللي كانت فوق الكوبري ما صدقتني.
وبرغم إني عرضت عليها فلوس كتير تجيب شوكلاتة لاقيتها برضو متمسكة بأمها وماحستش ناحيتها بأي طمع.
وشخص زي ده مستحيل أقدر أعمل معاه حاجة ، لإنه أقوي مني بكتير"
ومرة واحدة سمعتها بتقول :
- أنت مين ؟!
بصيتلها بطرف عيني وقُلت :
= أنا اللي هقف يوم القيامة في مشهد صعب قدام كل البشر ، قُدام كُل الخصوم ، الظالم والمظلوم ، كل واحد ساب طريق الصح ومشي ورايا وهقولُهم :
"فَلَا تَلُومُونِي وَلُومُوا أَنفُسَكُم".
ولو حد فيهم قالي أنت السبب هقولُه :
"إِنِّي بَرِيءٌ مِّنكَ إِنِّي أَخَافُ اللَّهَ رَبَّ الْعَالَمِينَ"

* دايمًا الاختيار قدامك أنا مابغصبش حد علي حاجة ، أنا ملعون في كل الأديان وكل الأزمان.

بدخل للإنسان الضعيف وبستغل يأسُه وبالرغم إن بيكون فيه مميزات كتير أوي ، إلا إنه مُصمم يفضل باصِص علي النقطة السودا الصغيرة اللي موجودة في وسط صفحة بيضا كبيرة ، ويوم ورا التاني النقطة دي بتفضل تكبر تكبر لحد ما الصفحة كلها تبقي سودا.

النقطة السودا دي هي الشك والضعف ، والصفحة البيضا هي الأمل والإيمان.

* الخلاصة : ربنا خلق كل البشر بقلب الطفلة نورهان ، أبيض ونضيف ، بيحب الناس ، مش طماع ، ماظلمش حد ، إيمانُه قوي وشايف نفسه جميل ، بس الشك بيخلينا ندور علي عيوبنا ، ونتجاهل المميزات لحد ما النقطة السودا تفضل تكبر وتكبر واليأس يتمَكِن مِننا أكتر.

وفي اللحظة دي الشيطان بيتسغل الفرصة ويدخل حياتنا ويفرحنا لحظة نعيش بسببها طول عمرنا ندمانين.

- فـ لو شوفت حد جميل قوله أنت جميل ، ولو لاقيت عيب في حد قريب منك ماتبينلوش وحاول تغيرهوله.

- ربي إبنك كويس وعرَّفُه إن الحلال هيفضل حلال والحرام هيفضل حرام ، ومافيش حل وسط .. وإن الشيطان ضعيف وربنا ميزنا عنُه.

- امسحوا النقطة السودا اللي في حياة بعض بجمال قلوبكُم وخلوا الصفحات كلها بيضا ، ماتسمحوش لليأس إنه يسيطر علي عقل حد.

- ماتسيبوش حبايبكُم لوحدُهُم كتير لإن الوحدة صعبة أوي وبتِطفي الروح وأهم سبب لليأس.

- العُمر اختبار قُصير فـ عيشوه صح.

- ربنا دايمًا سايبلِنا الاختيار .. يا جنة يا نار.