منين نبدأ مع القرآن؟! كل آية ليها حكاي
ليه بنعدى على آيات القرآن من غير ما نفهمها؟!
احنا لما نشوف بوست بيتكلم عن موضوع واحنا مش عارفينه، بنفضل ندور عليه لحد ما نعرف كل تفاصيله!
نقلب في كل المواقع، وندور على فيديوهات، ونقرأ تعليقات، ونشوف رأي الناس… علشان بس نحس إننا فهمنا اللي بيحصل.
طب ليه مش بنعمل كده مع القرآن؟
ليه لما نقرأ آيات مش فاهمينها، بنعديها وخلاص؟
ليه بنخلي علاقتنا مع كتاب ربنا سطحية ومجرد ترديد بدون فهم أو تدبر؟
قال الحسن البصري:
"ما أنزل الله آية إلا وهو يحب أن يعلم في ماذا أنزلت، وماذا عنى بها"
يعني مفيش آية نزلت كده وخلاص… كل آية ليها قصة، وليها سبب نزول، وليها معنى لازم نفهمه، لأن ربنا عايزنا نعيش بالقرآن، مش بس نقرأه!
وقال كمان:
والله ما تدبره بحفظ حروفه وإضاعة حدوده، حتى إن أحدهم ليقول: قرأت القرآن كله، وما يُرى له القرآن في خلق ولا عمل"
يعني ممكن تلاقي حد حافظ القرآن، بس عمره ما حاول يفهم أو يطبّق، فيبقى تأثيره عليه ضعيف، كأنه ما قرهوش أصلًا.
- "حكاية آية"… محاولة بسيطة نغيّر بيها ده
ومن هنا بدأت فكرة سلسلة "حكاية آية"
سلسلة خفيفة، قريبة من القلب، بنحكي فيها عن أسباب نزول الآيات، والقصص اللي كانت وراها.
بنحاول نوصل الرسالة اللي في كل موقف، ونسأل نفسنا: إيه الحكمة؟ إيه المعنى؟ أنا فين من ده؟
لأن فهم السياق بيساعدنا نربط بين الآية وواقعنا…
ويخلينا نشوف القرآن مش كأنه كتاب بعيد… لأ، ده رسائل لينا احنا، لكل موقف بنمر بيه.
تدبر القرآن مش رفاهية… ده أمر من ربنا
قال الله تعالى: "أَفَلَا يَتَدَبَّرُونَ الْقُرْآنَ أَمْ عَلَىٰ قُلُوبٍ أَقْفَالُهَا"
يعني اللي مش بيتدبر… كأن قلبه متقفل! ومش هنتدبر من غير ما نفهم ولا هنفهم من غير ما نعرف:
- - ليه الآية دي نزلت؟
- - مين المقصود؟
- - إيه اللي حصل وقتها؟
- - وإزاي ده ممكن يخصني النهارده؟
- القرآن حياة… مش مجرد كلمات
القرآن مش بس وسيلة نلم بيها حسنات ، ولا كلام بيتقال في الصلوات وخلاص .. القرآن نازل علشان يعيش جوانا
علشان يربينا، يطهرنا، ينور طريقنا، ويكون معانا في كل موقف
كل آية فيها هداية
وفي كل "حكاية آية" فيه لمسة توصل لقلبك
فيه معنى يحرّكك… ويخلّيك تراجع نفسك
-
- هدفنا في السلسلة دي
1- نحب القرآن ونقرب منه أكتر
2- نربطه بواقعنا ونفهم رسائله
3- نعيش بالآيات مش نعديها
4- نعرف أسباب النزول ونشوف المواقف اللي حصلت
5- وناخد منها تطبيق عملي نقدر نعيشه ونفكّر بيه كل يوم
---
"حكاية آية" مش مجرد سلسلة دينية
دي دعوة نرجع نقرأ القرآن بعين تانية
بعين بتدور على المعنى، مش على عدد الصفحات
وبقلب بيسأل نفسه: "يا ترى الآية دي بتقول لي إيه؟"
مستنياكم في اول مقالة في حكاية آية
