الحلقة الخامسة عشر من قصة فارس الاسلام
الحلقة الخامسة عشر من قصة #فارس_الاسلام
قرر النبي صل الله عليه وسلم انه يختار بيت من بيوت الصحابة اللي اسلموا يكون بيته واسع وبعيد عن العيون!
وبالفعل اختار النبي دار "الارقم ابن ابي الارقم "
والاختيار ده مبني على اسس وحكمة من اهمها
ان دار الارقم واسعه وتساع الناس اللي اسلموا
انها بعيد عن اهل مكة "كانت على جبل عند حدود مكة وقتها"
وعشان الارقم ده كان وقتها شاب صغير عنده 16سنه
فمستحيل الكفار يشكوا في ان بيته هي مقر الدعوه لو عرفوا اخبار الدين الجديد ياعني!
وفيه رواية بتقول انهم كانوا اربعين واحد او اكتر شوية وقتها، وكل لما كان ينزل آيات قرءآنية عالنبي
يبلغهم يتجمعوا عشان يتلوها عليهم، ويعرفهم الاوامر والنواهي من الله عز وجل
وفضل الحال على كده مدة تلت سنين ، وفي خلال التلت سنين دول بدأت الناس تتكلم عالدين الجديد لحد ما الكفار شموا خبر الدين الجديد !
لكن الحلو في الموضوع انهم مهتموش، وقالوا ان محمد عاوز يبقى على المله الحنفية زي سيدنا ابراهيم عليه السلام
والحنفية دي ياعني التوحيد والايمان بإله واحد فقط!
وقالوا لبعض هو حر ، ومتخيلوش اللي هيحصلهم بعد كدة!
ولكن شوية شوية الاسلام بدأ ينتشر !
والناس معدش وراها غير الكلام عن محمد ودينه ، بين مؤيد قليل ومعارضين كتير جدا من الكفار!
وطبعا الكلام وصل لسادة قريش ولما شافوا ان الكلام كتر، وان كل يوم الناس بتسيب دينهم ودين آبائهم ويدخلوا دين محمد!
الغضب ملا قلبهم والخوف من ترك دين الآلهة العجيبه دي كان امر مش هين ابدا!
وفي نفس التوقيت نزل عالنبي الوحي بأمر من الله تعالى
قال الله عز وجل:
"واصدع بما تؤمر واعرض عن المشركين "
وده امر من الله لنبي محمد ان يعلن عن الاسلام لكل الناس
ويبدأ يدعي الكل خصوصا خصوصا اهله
قال الله عز وجل :
"وانذر عشيرتك الاقربين "
والنبي طبعا مكدبش خبر وقام واقف علي جبل الصفا ونادى بأعلى صوته وينادي علي كل القبائل!
يا بني فهر يا بني عدي -وكل القبائل - لحد تقريبا ما كل الناس اتجمعت عنده صل الله عليه وسلم
حتى اللي ماكانش عارف يروح كان يبعت حد يشوفله ايه الحكاية!
ولما النبي شافهم كلهم قال:
" لو اخبرتكم ان خيلا بالوادي تريد ان تغير عليكم اكنتم مصدقي؟"
قالوا طبعا احنا عمرنا ماشوفناك بتكذب!
قال صل الله عليه وسلم:
" فإني نذير لكم بين يدي عذاب شديد"
رد واحد من سادة قريش اسمه "ابو لهب "
قال "تبا لك الهذا جمعتنا؟ !"
ومن هنا هتبدأ المرحلة الجديدة للاسلام
وهي مرحلة الدعوة الجهرية 🤍
يتبع .....
