قصه سيدنا ( يونس)
قصه سيدنا يونس:
لما ربنا سبحانه وتعالي حب يعاتب سيدنا يونس.
، كان عتاب ربنا ليه أشد من عتابه لأي نبي تاني باستثناء سيدنا آدم .... 🤚
✍️ تعالي اقلك القصه من الاول....
كان فيه مدينة في شمال العراق اسمها ( نينوي ) عاصمة الدولة الأشورية ....
كانت من أغنى وأعظم المدن في التاريخ مش بس في الحقبة الزمنية بتاعة سيدنا يونس ....
حاجة كده باختصار من كثر عظمتها مش هيجي زيها تاني …
ربنا وسع عليهم في الرزق بشكل كبير جدا ....
بس رغم نعم ربنا عليهم دي كلها كانوا بيعبدوا الأصنام …
وبعدين ؟
بعدين ربنا أرسل لهم يونس يدعوهم أن يعبدوا الله الواحد الأحد ولا يشركوا به ....
سنين وسنين يونس بيحاول معاهم بكل الطرق ....
لم يؤمن فيهم ولا واحد ....
ولا طفل ولا كبير ، لا غني ولا فقير ، لا راجل ولا ست ...
كلهم كانوا بيسخروا منه ولا يتعاملوا معه
لحد ما في يوم ربنا قال ليونس قول لقومك ان ربنا هيعطيهم مهلة 3 أيام ليتوبوا فيها لربنا ، ولو لم يتوبوا سوف يحل عليهم عقاب ربنا زي ما حل بالأقوام اللي قبلهم .... 👈
قالوا له قول لربك اللي عايز يعمله يعمله ....
هنا غضب عليهم يونس غضب شديد وتركهم ومشي ويأس منهم ....
دون أن يفكر للحظة إن ربنا ممكن يرحمهم ...
وإن ممكن قبل ما الثلاث أيام ينتهوا حد فيهم يستغفر ربنا....
المهم قبل ما الثلاث أيام ينتهوا كانت القرية بالكامل آمنت !!
لأنهم حسوا بالفزع والخوف لما لقوا الحيوانات بتجري ومضطربة كأنها بتتوقع حدوث كارثة قريبا....
ودي تعتبر أعظم توبة في التاريخ... القرية بالكامل آمنت بربنا في أقل من ثلاث أيام
{ فَلَوْلا كَانَتْ قَرْيَةٌ آمَنَتْ فَنَفَعَهَا إِيمَانُهَا إِلا قَوْمَ يُونُسَ لَمَّا آمَنُوا كَشَفْنَا عَنْهُمْ عَذَابَ الْخِزْيِ فِي الْحَيَاةِ الدُّنْيَا وَمَتَّعْنَاهُمْ إِلَى حِينٍ }
ربنا قبل توبتهم كلهم ورفع البلاء عنهم....
🛑 في اللحظات دي سيدنا يونس إستعجل على قومه وراح للبحر وركب سفينة مليانة بالناس والبضائع ..…
لما ركب معاهم الرياح اشتدت والسفينةأصبحت تهتز....
الركاب اصابهم ذعر ،
ألقوا البضائع كلها عشان السفينة لا تغرق برضه مفيش فائدة ، فاقترح واحد انهم يضحوا ببعضهم عشان ينجوا الباقيين…
القرعة وقعت على يونس ، قالوله لأ شكلك راجل صالح طيب احنا نعيد القرعة تاني ، وفي كل مرة تقع القرعة عليه....
في الآخر رموه في البحر هدأت الأمواج ،
وربنا أوحى للحوت ان يبتلع يونس بدون ما يخدش ليه لحم أو يكسر ليه عضم....
🛑و سيدنا يونس دخل في رعب لأنه مر ب3 ظلمات ....
ظلمة الليل
ظلمة قاع البحر
وظلمة بطن الحوت
في اللحظة دي يونس تذكر أعظم كلمة فدعا بها واعترف بذنبه وقرر يتوب وقال (لا إله إلا أنت سبحانك إني كنت من الظالمين)
اعترف يونس بخطأه ، بتقصيره لأنه إستعجل على قومه ، ندم يونس
{وَذَا النُّونِ إِذْ ذَهَبَ مُغَاضِباً فَظَنَّ أَنْ لَنْ نَقْدِرَ عَلَيْهِ فَنَادَى فِي الظُّلُمَاتِ أَنْ لا إِلَهَ إِلاَّ أَنْتَ سُبْحَانَكَ إِنِّي كُنتُ مِنْ الظَّالِمِينَ} .
{ فَلَوْلاَ أَنَّهُ كَانَ مِنْ الْمُسَبِّحِينَ }
( فَاسْتَجَبْنَا لَهُ وَنَجَّيْنَاهُ مِنَ الْغَمِّ وَكَذَلِكَ نُنجِي الْمُؤْمِنِينَ )
" لولا أنه كان من المسبحين .. "
دي بتُفيد إنه كان أصلاً طبعه من المسبحين طول حياته .. (المسبحين : المُصلين ، الذاكرين )
يعني مش علشان حصل موقف شِّدة وذكر ربنا فى وقتها ربنا نجاه .. لأ هو كان طبعه الخيرات وفيه باب صلة بينه وبين ربنا موجود على طول ..
وده إن دل .. يدل على وجوب ترك باب للطاعة بينك وبين ربنا ، عشان ربنا ينجيك به في وقت الشدة .…
بعد كده ربنا لما قال { فَنَبَذْنَاهُ بِالْعَرَاءِ وَهُوَ سَقِيمٌ } سقط يونس على شاطئ البحر بين الحياة والموت .... سقيم ... جلد على عظم ...
ربنا قال بعدها ، بعد خروج يونس من بطن الحوت :
{ وأَنْبَتْنَا عَلَيْهِ شَجَرَةً مِّن يَقْطِينٍ }
رحمة ربنا به انه أنبت له شجرة مخصوص ، لم تكن موجودة ، عشان تحميه من الشمس ، وعشان يتقوى منها...
◻️بس ليه بقا اليقطين ؟
لأن اليقطين هو القرع بأنواعه المختلفة ومنه قرع العسل ، ودي شجرة فيها أكبر حجم لورقة نبات ممكن تظلل انسان وكمان اوراقها فيها مضادات حيوية لعلاجه... ربنا أنعم عليه بظل اليقطين وبطعام الشجرة حتى تعود له قوته.
لما رجع يونس لقومه لقى ايه بعد العذاب ده كله ؟؟؟
لقى أكتر من مائة ألف انسان كلهم آمنوا بالله
كل المدينة ....
(و أرسلناه إلى مائة ألف أو يزيدون )
ترك الرجال مراعيهم ومواشيهم ..
وتركت النساء البيوت وخرجن لاستقبال نبى الله يونس عليه السلام .. حتى الأطفال أقبلوا لتحيته واستقباله وتقبيله ..رجوع يونس ليهم كان عيد كبير للمدينة وفرحة كبيرة ليهم.🤍 ✨
