قصة السيده مريم

قصة مريم بنت عمران

(إِذْ قَالَتِ امْرَأَتُ عِمْرَانَ رَبِّ إِنِّي نَذَرْتُ لَكَ مَا فِي بَطْنِي مُحَرَّرًا فَتَقَبَّلْ مِنِّي ۖ إِنَّكَ أَنْتَ السَّمِيعُ الْعَلِيمُ)

طب هيحصل ايه ؟

المفاجأة... هتضعها انثي.. وكإن ربنا عايز يقولنا إنه سبحانه ينصر دينه بمن يشاء.

(فَلَمَّا وَضَعَتْهَا قَالَتْ رَبِّ إِنِّي وَضَعْتُهَا أُنْثَىٰ وَاللَّهُ أَعْلَمُ بِمَا وَضَعَتْ وَلَيْسَ الذَّكَرُ كَالْأُنْثَى ).

طب مين الأنثى دي؟

دي سيدة نساء العالمين السيدة مريم

(وَإِنِّي سَمَّيْتُهَا مَرْيَمَ وَإِنِّي أُعِيذُهَا بِكَ وَذُرِّيَّتَهَا مِنَ الشَّيْطَانِ الرَّجِيمِ)

انها تسميها مريم ده دليل علي ثباتها برضو رغم انها انثى .. لإن مريم يعني العابدة او خادمة العباد.

الرسول عليه الصلاة و السلام بيقولنا حديث جميل اوي علي الآية دي .. ( ما من مولود يولد ويبكي الا ويمسه الشيطان .. إلا مريم وعيسي ) .. طب ليه ؟ .. اصل الام دعت فربنا استجاب دعوتها.

ستنا مريم هي المرأة الوحيدة اللي ذكرت بإسمها في القرآن،

وذكر اسم مريم في القرآن ٣٤ مرة >>>> بعدد سجدات اليوم .. لأنها كانت كثيرة السجود.

ستنا مريم كانت بتحب ربنا حب شديد وبتسجد كتير و بتحب العمل الخيري بتساعد الايتام والارامل وكانت خادمة لبيت المقدس...

دي كمان اعتزلت وبعدت عن اهلها عشان تعرف تعبد ربنا براحتها.

(وَاذْكُرْ فِي الْكِتَابِ مَرْيَمَ إِذِ انْتَبَذَتْ مِنْ أَهْلِهَا مَكَانًا شَرْقِيًّا)

وبقي سيدنا زكريا كل ميدخل عليها المحراب يلاقيها بتصلي.. لا دة بيلاقي ايه كمان ؟

>دة كل ميدخل يلاقي عندها رزق بقي يلاقي فاكهة الصيف في عز الشتاء وفاكهة الشتاء في عز الصيف وتكون مخرجتش ويلاقي عندها اكل كتير...

فيسالها يا مريم منين جبتي دة ؟

فتقوله هو من عند الله.

(كُلَّمَا دَخَلَ عَلَيْهَا زَكَرِيَّا الْمِحْرَابَ وَجَدَ عِنْدَهَا رِزْقًا ۖ قَالَ يَا مَرْيَمُ أَنَّىٰ لَكِ هَٰذَا ۖ قَالَتْ هُوَ مِنْ عِنْدِ اللَّهِ ۖ إِنَّ اللَّهَ يَرْزُقُ مَنْ يَشَاءُ بِغَيْرِ حِسَابٍ).

طب ليه في الآية هنا قال زكريا بالذات ؟

لانه هو اللي كان بيكفلها... يعني ايه ؟

بعد موت ابوها عمران .. وامها طبعا كبيرة في السن .. بقوا يتخانقوا مين اللي يكفلها لان ابوها كان معلمهم وكان من كبار علماء بيت المقدس.

فاتفقوا انهم هيقفوا عند النهر ويرموا اقلام ..

و ده وفاء لأبوها لانه كان بيعلمهم بالاقلام .. واخر قلم تيار النهر يجرفه هو ده اللي يكفلها ( يعني اخر قلم يوصل الشط ).

و رموا .. كل الاقلام تجري وقلم سيدنا زكريا يقف ف مكانه ميتحركش .. طب نعيد تاني .. برضوا ميتحركش .. لحد تالت مرة بقي كفلها سيدنا زكريا

(وَمَا كُنْتَ لَدَيْهِمْ إِذْ يُلْقُونَ أَقْلَامَهُمْ أَيُّهُمْ يَكْفُلُ مَرْيَمَ وَمَا كُنْتَ لَدَيْهِمْ إِذْ يَخْتَصِمُون)....

وبدأت مريم تشوف الملائكة وتخاطبهم كمان..

(وَإِذْ قَالَتِ الْمَلَائِكَةُ يَا مَرْيَمُ إِنَّ اللَّهَ اصْطَفَاكِ وَطَهَّرَكِ وَاصْطَفَاكِ عَلَىٰ نِسَاءِ الْعَالَمِينَ)

دي كمان بقت تشوف سيدنا جبريل .. و دي منزلة عالية جدا..

دلوقتي خلاص ستنا مريم بقت جاهزة للمعجزة >>>>

هيدخل لها سيدنا جبريل المحراب علي هيئة بشر وهيقولها علي المعجزة.... انك هتحملي وتلدي وانت عذراء..!!

( فَأَرْسَلْنَا إِلَيْهَا رُوحَنَا فَتَمَثَّلَ لَهَا بَشَرًا سَوِيًّا)

(قَالَتْ إِنِّي أَعُوذُ بِالرَّحْمَٰنِ مِنْكَ إِنْ كُنْتَ تَقِيًّا).

هي مكانتش عارفة ان ده سيدنا جبريل..

وهي مكنش بيدخل عليها اي راجل المحراب .. فخافت منه

هيقول لها ان هو رسول من عند ربنا..

(قَالَ إِنَّمَا أَنَا رَسُولُ رَبِّكِ لِأَهَبَ لَكِ غُلَامًا زَكِيًّا)

هتقوله ازاي وانا لم يمسسني بشر؟!

(قَالَتْ أَنَّىٰ يَكُونُ لِي غُلَامٌ وَلَمْ يَمْسَسْنِي بَشَرٌ وَلَمْ أَكُ بَغِيًّا)

فهيرد عليها سيدنا جبريل >> ده سهل اوي علي ربنا مش حاجة صعبة..

(قَالَ كَذَٰلِكِ قَالَ رَبُّكِ هُوَ عَلَيَّ هَيِّنٌ ۖ وَلِنَجْعَلَهُ آيَةً لِلنَّاسِ وَرَحْمَةً مِنَّا ۚ وَكَانَ أَمْرًا مَقْضِيًّا).

كلنا عارفين الغلام مين طبعا >>> هو سيدنا عيسى

وحملت ستنا مريم وطلعت برة بيت المقدس وراحت مكان بعيد عن اهلها

(فَحَمَلَتْهُ فَانْتَبَذَتْ بِهِ مَكَانًا قَصِيًّا)

و هيجلها المخاض ( آلام الولادة) ومفيش قدامها غير نخلة يابسة، وصحراء جرداء

(فَأَجَاءَهَا الْمَخَاضُ إِلَىٰ جِذْعِ النَّخْلَةِ قَالَتْ يَا لَيْتَنِي مِتُّ قَبْلَ هَٰذَا وَكُنْتُ نَسْيًا مَنْسِيًّا ) 

فيناديها سيدنا عيسي ويقولها:

(فَنَادَاهَا مِنْ تَحْتِهَا أَلَّا تَحْزَنِي قَدْ جَعَلَ رَبُّكِ تَحْتَكِ سَرِيًّا)

. يعني عين مياه تسري،

كمان فوقيكي النخلة اللي كانت يابسة بقي فيها تمر

(وَهُزِّي إِلَيْكِ بِجِذْعِ النَّخْلَةِ تُسَاقِطْ عَلَيْكِ رُطَبًا جَنِيًّا)

(فَكُلِي وَاشْرَبِي وَقَرِّي عَيْنًا) .. ياه علي حنان ربنا

وهيقولها لما اي حد يكلمك مترديش عليه..

(فَإِمَّا تَرَيِنَّ مِنَ الْبَشَرِ أَحَدًا فَقُولِي إِنِّي نَذَرْتُ لِلرَّحْمَٰنِ صَوْمًا فَلَنْ أُكَلِّمَ الْيَوْمَ إِنْسِيًّا).