هل الأرواح تتلاقى وتتحدث في حياة البرزخ؟
هل الأرواح تتلاقى وتتحدث في حياة البرزخ؟
يجيب عن هذا السؤال فضيلة الأستاذ الدكتور/ علي جمعة من كبار علماء الأزهر الشريف - مصر
في الأحاديث في تفصيل إن الروح لما تكون روح خبيثة شريرة بتطلع وتروح في مكان والروح الطيبة بتروح في مكان تاني وحتى الأماكن دي لها أسماء في السنة يقول لك دي برهوت، برهوت دي اللي هي المكان الوحش اللي هيروح فيه والتاني عدن برضو يروح في حتة تانية.
البرزخ يعني إيه؟
يعني عنق الزجاجة يعني كأن الدنيا دي حتة واسعة كده وبعدين فيها عنق زجاجة وبعدين في حتة واسعة تانية، دية الدنيا ودي الآخرة الواصلة بينهم هو البرزخ، برزخ يعني مضيق بين واسعين. البرزخ عارف إيه هو، البرزخ هو مضيق باب المندب اللي بين البحر الأحمر والمحيط الهندي، المحيط واسع والبحر واسع وبينهم حتة ضيقة كده، أهو ده البرزخ، بينهما برزخٌ لا يبغيان. في حتة دقيقة كده بين النهر وبين البحر فالحلو ما يدخلش في المالح والمالح ما يدخلش في الحلو فالبرزخ ده مكان هو الانتقال اللي ما بين الدنيا وبين الآخرة، الروح لما بتطلع نشوف إذا كانت طيبة تروح هنا كده هوه في عدن، والتانية تروح في برهَوِت، بتقول طيب الأرواح اللي راحت هنا كده هتعرف بعضها؟ الأرواح دي كتيرة ممكن آه يعرفوا بعضهم بتقول من ساعة سيدنا موسى؟ آه من ساعة سيدنا آدم إشمعنا سيدنا موسى ده حتى من ساعة سيدنا آدم، فا ممكن نعرف وممكن ما نعرفش روح مين ده؟ دي روح جدي، ممكن إن ينكشف لي إن ده جدي وممكن ما ينكشفش فابقى عارفه شايفه في الأرواح مش عارف إن ده جدي إلا لما أعرف إسمه، الله هو إنت جدي؟ آه ده أنا علي ابن جمعة، وهذا اللي حادث إنهم عندهم حياة تحررت من الجسد، عندهم محادثات وعندهم لغات وعندهم كذا إلى آخره.
وبعدين طلعت الروح النهاردة ودخلت في الناس الطيبين، الله أهلا وسهلا فلان جه يا ولاد ده فلان جه أهوه، فيسألونه حتى في هر الدار، يقولوا له إحنا كان عندنا زمان قطة، راحت فين القطة دي، يتكلموا مع بعض.
طيب ماشي، فلان عمل إيه؟ قال لهم فلان عمل إيه! ده مات قبلي بـ 10 سنين. قالوا إنا لله وإنا إليه راجعون خولف به إلى النار (إلى برهوت). لأنه ما شفناهوش ده احنا كنا مستنيين، ابنهم بردو أو كذا، الكبيرعمل أيه؟ أو ابن خالتك عمل أيه؟ أو كذا، يقول لهم عمل إيه! ده 10 سنين ميت أديله 10 سنين. يقولوا إنا لله وإنا إليه راجعون خولف به (يعني راح الناحية التانية) ويترحموا عليه أو يقولوا إن ده يعني يا خسارة.
فا أيوة في محادثة بين الأرواح، الأرواح دي عندها حاجة تكشف به مكان دفنها، مكان دفن الجثة، زي ساتالايت كده ولله المثل الأعلى، يفتحه ويقفله، بيتفح طبيعي ما بين عصر يوم الخميس إلى فجر يوم السبت، يتفتح لوحده، هل تنزل الروح؟ لا ما بتنزلش هيا قاعدة هناك في البرزخ وكل حاجة بس بيتفح لها نافذة زي المونيتور زي جوجل إيرث فا يتفتح كده، لو إنك رحت القبر في الفترة دي من عصريوم الخميس لفجر يوم السبت يشوفك ما أنت ظهرت أهوه في الكاميرا.
طيب، إنت قرأت له الفاتحة ووهبت ثوابها، يارب هب ثوابها لروح أبويا، قوم يغلفها له كده هدية ويوديهاله خذ، فيقرأ الإسم مين اللي باعتها؟ اللي باعتها ابنك حسن، يفتح يلاقي فيها فاتحة تمام ودعاء، (أو ابن صالح يدعو له) فلما يفتح ويلاقيها كده يدعي له، آه يقول ربنا يجازيه خير افتكرنا، ما أحوجنا لهذه الهدية دلوقتِ، لأن الهدية دي بتلطف الـ بتحسسهم بشعورات طيبة. هل تزيد من الدرجات؟ بتزيد من الدرجات وتتحفظ وكل حاجة. ربنا واسع كريم، (وما قدروا الله حق قدره)، مش بحساباتنا لأ، ده حاجة كريمة وحلوة وحاجة ..، لو عرفت ربك أحببته حتى ولو كنت بتخافه أو حتى لو كنت، يعني فيه شعور بالرهبة لجلال الله، لكن فيه جمال سبق الجلال.
فالإنسان الحقيقة هايشوف حاجات حلوة. ودي الإجابة على السؤال.
-انتهى-
