الحلقة التاسعة عشر من قصة فارس الاسلام

الحلقة التاسعة عشر من قصة #فارس_الاسلام

راح ابو طالب جري لقريش ونادي عليهم كلهم !

وقالهم ان الوثيقة اللي انتم كتبتوها بمقاطعة بني هاشم الارضة "حشرة من الارض"
اكلتها ومعدش فيها غير اسم الله !
وقال ان لو الكلام ده مطلعش صح،  هعطيكم محمد حالا تقتلوه! !
وده طبعا بيدل على مدى ثقة ابو طالب في كلام ابنه وحبيبه محمد صل الله عليه وسلم
وقبل ده مايحصل بليلة:
كان فيه واحد من الكفار اسمه
هشام بن عمرو كان زعلان على اللي بيحصل في بني هاشم
وكان بيحاول يعطلهم اكل في السر بدون ماحد يعرف!!
وفي الليلة دي راح لواحد اسمه
زهير ابن ابي امية وده كان ابن عاتكة بنت عبد المطلب ياعني تبقى عمة الرسول ياعني هو يبقى ابن عمة الرسول صل الله عليه وسلم
كلمه هشام وقاله يا زهير
انت قاعد هنا بتاكل وتشرب واخوالك جعانين ومش لاقين حاجة ياكلوها!
قاله طيب اعمل ايه وانا واحد ازاي هقدر علي قريش لوحدي!
بس والله لو كلن معايا كمان واحد لاروح افض القانون ده!
قاله مانت معاك واحد!
قاله مين ده، رد وقال انا!
قاله زهير عاوزين رجل تالت معانا عشان نكون اقوى!
فراح هشام لواحد اسمه
المطعم ابن عدي
وقاله ازاي انت قاعد كده ومش بتفكر في الناس البركة اللي كنت بتحبهم
نسيتهم خلاص
رد وقاله طيب اعمل ايه
ده انا رجل واحد!! رد هشام وقاله معاك رجل تاني
قاله مين
قال زهير ابن امية
قاله عاوزين كمان واحد
قاله فيه واحد تالت بالفعل
قاله مين
قال انا
قاله عاوزين كمان واحد رابع!
راح هشام لابي البختري ابن هشام
فقاله زي ماقال للي قبله
قاله عاوزين واحد خامس
راح لواحد اسمه
زمعة بن الاسود وكلمه زي ما كلم اللي قبله!
وخدوا بعض الخمسة وراحوا تاني يوم عند الكعبة
وزهير قال انا اللي هتكلم 
لبس كويس وطاف بالكعبة سبع مرات ،ونادى وقال
يا اهل مكة
اناكل ونشرب ونلبس الثياب وبنو هاشم هلكى لا بتبيع ليهم ولا بيبعيوا لينا! 
والله لافضل قاعد هنا لحد ما الوثيقة دي تتقطع!
وايدوا طبعا الاربع رجال التانين
رد ابو جهل
كذبت مفيش حاجة هتتقطع !
رد زمعة وقاله
انت اكذب
احنا ماكناش راضين عنها ولا عن اللي فيها 
ورد ابو البختري وقال صدق زمعة احنا فعلا مش موافقين على اللي فيها ده
والمطعم ابن عدي وهشام ابن عمرو قالوا نفس الكلام! !
وكل ده وابو طالب قاعد في جنب سامع كل الكلام
لما جاله النبي وبشره البشره ان الارضه اكلت الصحيفه
وراح ابو طالب زي ماقلنا في الاول!
وكل ده وكل الكفار مذهولين 
قام المطعم وقال انا هقطعها بايدي، دخل وهو ابو جهل الكعبة
لقوها فعلا متآكله مفيش فيها غير اسم الله
وبإسمك اللهم
رمى ابو جهل الورقة وطالع غضبان غضب شديد وبدل ما يلين قلبه بعد تأكده من صدق النبي ،وان دي معجزه وعلامه على نبوته
عاند هو واللي معاه من المشركين بل وزاد عندهم وكفرهم
قال الله تعالى: { فَإِنَّهُمْ لَا يُكَذِّبُونَكَ وَلَكِنَّ الظَّالِمِينَ بِآَيَاتِ اللهِ يَجْحَدُونَ }"
وتخيلوا ان العذاب ده كان سبب كبير في محبة الاسلام
وان بقى احسن واقوى
لان كل القبائل العربية اللي عرفت موضوع الحصار ده
عابت علي الكفار انهم عملوا كده في اهلهم
وبدأت تسأل عن بنو هاشم وليه حصلهم كده
ومين محمد اللي قريش عاوزه تقتله
وليه تقتله
وايه الدين ده
تخيلوا بقى انتشار الكلام ده ممكن يعمل ايه! !
وده حصل في السنة التاسعه من البعثة النبوية
ولكن الخساير
اللي هتحصل في السنة العاشرة بسبب الحصار ده قوية جدا عالنبي عليه الصلاة والسلام
فبسبب الحصار ده والجوع اللي كانوا فيه بنو هاشم
اصبح ابو طالب ضعيف وهذلان من اكل ورق الشجر هو وخديجة زوجة النبي محمد عليه الصلاة والسلام لانها هي كمان كانت ضعفت جدا
لان سنها كان كبر تقريبا وصلت 65 سنه رضي الله عنها
ابو طالب نام وعيا جامد وبدأ يحتضر
اول ما النبي عرف بان عمه بيحتضر وهو يموت اتخض وراح جري لبيت عمه
وقعد جنبه
ولكن مكانش لوحده
كان النيلة ابو جهل قاعد هو كمان عاوز يطمن ان ابو طالب هيموت علي الكفر "حقير اوي "
كان بيفكر في بعدين
ان لو ابو طالب امن قبل مايموت حتى لو بلحظة عشان يرضي ابن اخوه
دين الوثنية هتضيع
ومش بعيد الناس كلها تآمن بعدها
كان شيطان خبيث بجد! !
وكان واخد معاه عبد الله ابن ابي امية وده كان ابن عمة الرسول اخوا زهير
ومع انه كان انسان كويس في صفاته الا انه كان بيعمل لابو جهل حساب
وعاوز مكانته تكون محفوظة
وشكله ومصلحته اهم من عمه ومن اللي خلفوه شخصيا “
قعد محمد جنب عمه وهو بيبكي وبيضغط على عمه مره واتنين يقول لا اله الا الله
ويقوله قل ياعم حتي احاج الله بها!
ولكن ابو جهل الشيطان وعبد الله
يردوا ويقولوا
يا ابو طالب معقول هتسيب دين ابوك عبد المطلب
هتسيب دينك اللي عشت عليه
يرد محمد ويقول قل ياعم لا اله الا الله
رد ابو طالب وقال
لولا خايف يقولوا عليا اني خوفت من الموت لكنت قولتها ارضيك يا ابني
ومات ابو طالب عالكفر للاسف
بكى الرسول وحزن حزنا شديد وقال هستغفر لك ربي يا عمي
فأنزل الله قوله تعالى:
"مَا كَانَ لِلنَّبِيِّ وَالَّذِينَ آمَنُوا أَن يَسْتَغْفِرُوا لِلْمُشْرِكِينَ وَلَوْ كَانُوا أُولِي قُرْبَىٰ مِن بَعْدِ مَا تَبَيَّنَ لَهُمْ أَنَّهُمْ أَصْحَابُ الْجَحِيمِ"
وبعدين نزلت الاية الكريمة:
"إِنَّكَ لَا تَهْدِي مَنْ أَحْبَبْتَ وَلَٰكِنَّ اللَّهَ يَهْدِي مَن يَشَاءُ ۚ وَهُوَ أَعْلَمُ بِالْمُهْتَدِينَ"
فرح الكفار في النبي وكانوا شمتانين فيه شماتة الموت
ولكن الابتلاء زاد عالنبي
بموت حبيبته وشريكة عمره ورفيقة دربه "خديجة"
ماتت بعد عمه ابو طالب بـتلت ايام بس
تخيلوا الحزن اللي النبي كان فيه
والقهر اللي كان حاسس بيه من موت احب الناس علي قلبه
وقال صل الله عليه وسلم ان العام ده اسمه "عام الحزن"...
يتبع....