الاستخارة سبب النجاة

كيف بتظهر نتائج الاستخارة ! 
وفوائدها شنو!
..
قبل كده كان في واحده كاتبه إنها بتحس إنو الاستخارة ما مفيدة شديد..وما عندها نتائج واضحه..
..
الجميل ف الاستخارة دي إنو فيها نوع من الخضوع..واللجوء إلى الله ..ع أساس إنو ربنا علام الغيوب ..وهو الوحيد اللي عارف اذا كان الموضوع الفلاني ده عندك فيه خير او شر 
وإنها برضو نوع من الدعاء..والدعاء يا برفع البلاء ..يا ربنا بدخرو ليك لوقت تكون احوج فيه ..يا بأجلو ليك كمان للآخرة..
يعني بإختصار مافي أمر إنت بتدخل فيه ربنا ..ربنا بطنشك فيه او بردك خائب 
..
بتبقى مشكلتنا خاصه نحن البنات عموما..إننا بنستعجل نتائج الاستخارة شديد ..يعني بتخيل لينا إنو لو استخرنا الليلة ..بكرة ربنا حيدينا إشارة ..او حننوم ونحلم بالموضوع..ودي حاجات نادرا ما تحصل..
..
حتى لو ما ظهرت ليك نتيجة واضحه ما تبطل استخارة...استخير مره واتنين وتلاته..ليه !
لانو ربنا بيعمل اي حاجه ف وقتها المناسب..والفترة اللي انت بتكون بستخير فيها دي ..ربنا بكون برتب ليك ف الأحداث..وبهيئ ليك ف الأسباب...سوا كان بحدوث الحاجه دي ..او عدم حدوثها..والاتنين في النهاية فيهم خير ليك ..
..
نحن بنفرح لما نشاور زول ويدينا رأي يطمنا ..فما بالك بالاستخارة اللي بتاخد فيها مشورة ربنا وبركتو!
بتطلب من ربنا إنو يقيف معاك ..وربنا مستحيل يترك عبدو..بس هو بحب العبد اللحوح 
..
عن نفسي بقيت مؤمنة بالاستخارة شديد..في كل خيارات الحياة ..بحس انو فيها نور بصيرة ..
بتذكر قبل كم سنه ..كان في موضوع شاغل بالي شديد وبفضل الاستخارة الموضوع وقف ..
لي يوم الليلة كل يوم بيحصل موقف يخليني اقول الحمد لله يارب إنو الموضوع ده ما كمل ..الحمد لله يارب إنك وضحت لي كل الأسباب...وفتحت عيوني على حاجات ما كنت عارفاها
..
ف انت لما تستخير ..ربنا بكافئك ع المدى البعيد بإنو يوريك الحكمة من العطاء او المنع..
"أليس الله بكافٍ عبده " 
..
استخيرو وأسالو الله نور البصيرة ..
ودي من أفضل الأيام اللي ممكن الواحد يستخير فيها 
لانو ربنا بكون أقرب لينا 💛