ليه بحس الدين تقيل

فن الدعوة هل الدين فروض و مواهب و بس ؟

 

فترة في حياة الكل

كنت بسأل نفسي ليه في ناس بتطلع كارهه الدين و التدين أو تكون فترة عدت عليك كنت بتفكر كده 

و غالباً بيشوفوا الدين هو شيء لفرض عقوبات و التزامات

الفترة دي ممكن تكون عدت عليك في حياتك و كنت ناقم على كل حاجة في حياتك و حاسس بالذنب و في نفس الوقت مش لاقي رد يشفي صدرك و في الاخر بينتهي الحال ده لحاجة من اتنين

إما انك بتقول استغفر الله العظيم ايه الي بفكر فيه ده و تسلِّم

لكن بيفضل الشبح ده معاك طول الوقت

أو الحالة التانية و هي الاسوء انك توصل للإلحاد و كره كل مظاهر التدين

 

•طب ايه الصح هل فعلاً الدين فرض التزامات و عقوبات و أوامر و نواهي بس؟

هل الدين فروض و نوهاي بس

طيب بهدوء …

←اول حاجة احنا ليه بنفكر كده أحياناً ؟

ممكن مثلا كنت بتكسل تصلي أو بتصلي و انت متضرر كده و كنت متضايق من الشعور ده و روحت سألت عن الموضوع ده و كان الرد عليك 

: لازم تصلي عشان ترك الصلاة حرام و هتدخل النار

: أول حاجة بنتسأل عليها هي الصلاة لو فسدت فسد باقي العمل

: تارك الصلاة كافر …

كلها إجابات احنا عارفينها أصلاً و طبعا منقدرش نقول إنها غلط لأنها صح طبعا و في ناس الاجابات دي بتخليهم يقتنعوا و بيكونوا بس محتاجين التذكرة دي 

لكن في حالتنا احنا بتكون ردود شبه (روبوتيه) منسوخة مش بنحس بيها ( للأسف طبعا ) و ساعات بتزود العند عند البعض و تبعده اكتر

و هنا بيكون اول إجابة لسؤال هو الدين أوامر و نواهي بس صوم و صلِ و و و ؟

اول حاجة بنحتاجها عشان نرد على نفسنا هنا هي أننا نفتكر أن فيه ناس كانت بتعيش مع الدين و هي حباه جداً بل و كانوا بيحاربوا عشانه الدنيا

( ف اكيد ده مش من فراغ )

اكيد كان عندهم حاجة  مش عندنا

الصراحة ايوه زمان كان كل المجتمع بيعين المسلم على دينه و لو كسل ينزل يصلي كان يلاقي الكل بيسأل عليه فينه و مجاش ليه الدرس ده  و هكذا

لكن دلوقتي الموضوع معكوس كل حاجة حواليك بتشدك لتحت

طب احنا محتاجين ايه ؟؟

محتاجين ناس عندها فقه في الدعوة و الرد على الأسئلة الي من النوع ده خصوصاً في الزمن ده الي الاغلبية فيه مستني اي حاجة تبعده عن الدين خالص

 مثال

أ : انا بصلي بس بحس انها غصب عني و تقيلة عليا و مش عارف اخشع

هنا في اجابتين ممكن واحدة تنفع بيهاا السائل و تقربه و واحدة تبعده و تخليه في نفس الدايرة ( الردود الروبوتية )

ج : انت ممكن تكون بتكسل تصلي و فعلاً الموضوع تقيل عليك و بص انت مش لوحدك في كتير عندهم الشعور ده (طمئنه و عمم المشكلة) بس خليني اعرفك انك لما بتصلي و انت حاسس انها تقيلة اوي عليك انت كده بتجاهد نفسك بتاخد اجر الصلاة و اجر انك بتجاهد نفسك ( ثمرة و نتيجة )

زي الشخص الي بيقرأ القرآن بصعوبة

((قال عليه الصلاة والسلام : والذي يقرأ القرآن ويتتعتع فيه وهو عليه شاقٌّ له أجران )) ( ذكره بحديث )

 و لو استمريت هتبقا مع الوقت من الخاشعين الي بيستمتعوا بالصلاة بس ادي نفسك فرصتك ( حسسه أنه في امل فيه )

 و بعدها تقدر تقوله أن الصلاة هي اول ما نسأل عنه و هكذا

شوفت الفرق بين :

: انت لو مصليتش هتبقى كافر و هتخش النار

و الاجابة المرتبة المصممة صح 

اولا بعمم الموضوع مش بركزه على شخصه هو ك سائل ( علمه قليل )

بعدها اطمئنه و اعرفه اجر العمل و افضاله و ممكن اذكره بلحظات زي اني أقوله ( افتكر مرة كنت خاشع فيها في صلاة التراويح في رمضان )

بعدها ممكن تبدأ تقوله العقوبات الي هي مهم تتقال جداً بردوا لكن هتكون المرة دي أكثر تقبلاً بالنسبه له

لا و كمان تقدر تعرفه أن الإيمان مش ثابت و أن له (شِره و فترة )

يعني في تزايد و نقصان

تقدر تخليه يسمع محاضرة لشيخ طريقته في الدعوة كويسة زي الشيخ امجد سمير و غيره من الشيوخ و الشباب الي طالع  …

بس كده موضوع كان عاملي انا شخصياً مشكلة و لقيته الحل كان لازم اشارك ❤️